Dienstag, 10. April 2018

Öpfelröschti

 
Hüt gits e mol en ganz en speziälä Pooscht, denn diä liäbi Janke vo Jankes Soulfood hät zum Ivänt "MundArt - Dein Rezept im Dialekt" iiglaadä. I ha mir denkt, so mach i doch gad dä ganzi Blogpooscht uf Thuurgauerdüütsch, schliässlich hät es sich jo au efängs bim tschätä und Esemeslä so ibüärgeret. Passänd zum Ivänt ha i mir es tüpisches Rezäpt überlaiht vom Thurgau und was lieht do nööcher als öbis mit Öpfe, den de schönschti Kantoon vo dä Schwiiz bestoht jo nur fascht us Öpelbööm. Klar mir hend no viel meh zbüütä in Moschtindiä. 

 
I ha laang überleit und bin den uf es Ässä cho, wo es bi üs de Hamm immer zum Znacht gee hät. Öpfelröschti. I glaubä das kennt mo gar nöd so würkli i de komplettä Schwiiz, aber bi üs im Thurgi isch es scho fascht Kulturguet. Öpfelröschti isch perfäkt zum Broträschtä ufzbruche oder a wenn mo Schrumbligi Öpfel de Hamm hät. De Arbätsufwand isch au nöd würkli gross. 5 Minutä schnipplä und circa 11 Minute am Härd. Bi mir gits das ab jetzt definitiif wiider meh. Binerä Orginal Öpfelröschti ghöret eigenlit Wiibeeri dezüä, aber mir laufs zun scho Chalt dä Ruggä ab, wenn i dra dänkä. Pfui Täufel. Also wer well tuet dri oder lohts eifach sii. Rezäpt schrieb i mit dä Wiibeeri...
 

Thurgauer Öpfelröschti
für 4 Schnäbbel am Tisch

200Gram alts Brot (am beste 1-2Täg alt)
1 Ässlöffel Butter
800Gram Öpfel (Cox Orange oder Gala)
2 Ässlöffel Wiibeerli
2 Ässlöffel Zucker
1 Teelöffel gmahlenä Zimmet
1dl Moscht
Zimtzucker für de letschti Kick
 

Brot i qadratischi fini Schibä (3milimeter dünn und 2 uf 2 centimeter) schnitte und Öpfel wäschä, viertlä und äbäfalls schiblä (3millimetter). Öpfel, Wiibeerli, Zucker, Zimmet und dä Moscht in e Pfannä ge und zuedeckt für 8 Minutä dämpfä. I dere de Butter inerä Brotpfanne schmelze und aschlüssänd d`Brotschiebe dinne aröste, aber nöd das viel Röstaroma git. Schön Goldig söllets sie. Jetzt derfet Öpfel zum Brot i Pfannä und es paar mol dürä gschwenkt werde. Portionswiis uf Täller aarichtä und mit Zimtzucker besträuä. Gad servirerä und vorallem gnüssä....

Lueget doch au no bi dä andere vorbi, i bi ganz gigelig uf diä viele verschiedenä Dialäkt und Rezept us dä Region. Mol luege was i alles verstohne.

Jankes*Soulfood - “Petze, Pitsche & Bodderloch” - (Mittelhessisches Platt) http://www.jankessoulfood.com/2018/04/petze-pitsche-bodderloch.html

Lebkuchennest - “Mosdsubbe” -  (Fränkisch)
https://www.lebkuchennest.de/mostsuppe-rezept-im-dialekt-mundart/
 Cuisine Violette - “Hessischer Schmandkuchen” (Südhessisch)https://cuisine-violette.com/2018/04/hessischer-schmandkuchen/
FrauBpunkt - Bayerischer Schweinekrustenbraten - (Bayrisch)
https://fraubpunkt.de/wordpress/schweinebraten-bayerisch-mundart/

Soulfoodqueens - Badische Krazete (Südbadisch)
https://www.soulfoodqueens.com/single-post/2018/04/08/Badische-Krazete

zimtkringel - “Gschmelzde Worschdspatza”
https://www.zimtkringel.org/gschmelzde-worschdspatza/

Schlemmerkatze - “Schalet” (Hinterländer Platt)
https://schlemmerkatze.de/schalet-hessischer-kartoffelauflauf

Ina Is(s)t - “Handkäs mit Musik uff neu gemachd mit Abbel und schaffe Sprosse”
https://inaisst.blogspot.com/2018/04/handkas-mit-musik-uff-neu-gemachd-mit.html


Hach i lach mi jo nur scho Schlapp ab denä luschtigä Nämä vo Gricht.

Ich wünsch eu en Guetä und Ufwiederluegä
Marlene

Ps: Die Auflösung auf Hochdeutsch kommt in den nächsten Tagen. Hinterlasst doch hier ein Kommentar ob ihr es verstanden habt oder nicht.



 
 

 




Related Posts Plugin for WordPress, Blogger...